Молитвы предначальные

Подъ Твое благоутробіе прибѣгаемъ, Богородице Дѣво, молитвъ нашихъ не презри въ скорбехъ, но отъ бѣдъ избави насъ, едина чистая и благословенная.
Госпоже, устнѣ мои отверзеши и уста моя возвѣстятъ хвалу Твою.
Госпоже моя, въ помощь мою вонми. Слава Тебѣ, сиротъ Мати, сотвори намъ милостива Вседержителя Бога.
О, Пресвятая Владычице, Пречистая Дѣво Богородице, Господа Бога моего Іисуса Христа Мати! Припадаю и молютися, яко Матери Царевой, предначиная къ Тебѣ недостойное мое сіе моленіе, еже пріемши, о. Мати Царя небесе и земли, принеси къ Царю царствующихъ, всѣхъ Господу, Сыну Твоему и Богу, и прощеніе всѣмъ согрѣшеніямъ моимъ испроси, житію моему подаждь исправленіе и на кончинѣ отъ воздушныхъ враговъ немятежное прешествіе, царствія божественный входъ отверсти исходатайствуй ми и тамо райскія пищи наслажденія, горняго онаго града, вышняго прекраснаго Іерусалима, веселія и неизреченныхъ того красотъ, свѣтлости же трисіяннаго Троичнаго свѣта и сладкаго гласа ангельскихъ пѣній наслаждатися: еяже славы и радости наслѣдника мя и святымъ всѣмъ сопричастника сотвори, вся бо можеши, яко Мати Царя Всемогущаго; и нынѣ убо, изряднѣе же въ часъ сей, услыши мя, Всемилостивая Владычице, предстояща Ти, вонми, Госпоже Царице, молебное пѣніе приносящу Ти.